संस्कृति

श्रीराम अधिकारी गोर्जे
मादी गाउँपालीका ९ गोर्जे, कास्की

आजकाल
खाली खाली छन् गाउँहरु
रित्ता रित्ता छन् बस्तीहरु
रोंधी घरहरु पनि खाली छन् ।

आजकाल
ठुले र सानीहरु पनि
दोहोरी गाउदैनन् ।
न नाँच्छन ठुली र सानेहरु
कम्मर मर्काई मर्काई
न बज्छ धिन ताकाताका धिनका
सुमधुर ताल
मादलहरुबाट,

मलाई आजकाल गाउँ
गाँउजस्तै लाग्दैन
हिजो यहि आँगनीमा
घाँटु र सोरठी गाउने ठुलेहरु
ठुलो मान्छे बन्न
बिदेश गएका छन
घाँटु र सोरठीमा नाँच्ने सानीहरु
उनै ठुलेहरुको प्रतिक्षामा
टोलाईरहेका हुन्छन् ।

बाँच्नुपर्ने मजबुरीले सताएसी
केही थान युवायुवतीहरु शहर झरे
केहि थान युवायुवतीहरु विदेश छिरे
उनीहरुसँगै
घाँटु र सोरठीहरु पनि
गाउँ छाडेर शहर झरे
मारुनी र लाखे नाचहरुले पनि
बोईङ्गमा उडान भरे
केहि साकेलाहरु खाडी छिरे
केहि कौडाहरु युरोप अमेरीका पसे
छन त सबथोक
गाउँमा नै छ
हाम्रो आफ्नो भाषा, संकृति र सभ्यता
गाउँमा नै छ ।

भजन र बालनमा बजाएको खैचडीलाई झै
बजाईरहेको छ समयले हामीलाई
रेटिरहेछ जिन्दगीले सारङ्गी बनाएर
झलकमानका गीतहरुसँगै
आमाले सोध्लिन नि खै छोरा भन्लिन ।

नोट / स्टार्स स्टुडियोको दोस्रो वार्षिक उत्सवको अवसरमा आयोजित खुल्ला कविता प्रतियोगितामा प्रथम हुन सफल कविता