आमा

रोशनी गुरुङ

आमा तिमीसँगको
मेरो सम्बन्ध पूर्व जन्मको हो 
त्यसैले त तिमीसँग मेरो 
मुटु जोडिएको छ
स्नेह बाँडिएको छ

यहाँ सम्बन्धको किनबेच र 
भाग बन्डा हुने त पराईसँग हो 
तर तिमीसँगको सम्बन्ध त 
त्यो भन्दा धेरै माथिको हो
जहाँ कुनै स्वार्थ छैन 
मुरीका मुरी मायाको भकारी छ

तिम्रो विशाल छाती नै 
मेरो लागि खुल्ला संसार हो
तिम्रो आँट र भरोसा नै मेरो लागि 
संघर्षको पहाड चढ्ने दरिलो खुट्टा हो
कहिल्यै नभाँचिने विस्वासीलो लौरो हो

म तिमीलाई 
अरुले नसम्झेको बेला सम्झिन्छु
अरुले सम्झेको बेला सम्झिन्छु 
तर सबै सम्झनाहरुको फोटोकपी गरेर
म तिमीलाई देखाउन सक्दिन

किनकि यिनै सम्झनाहरुको 
पाण्डुलिपि यो दिलमा कैद गरेर 
तिमीलाई कहिल्यै नमर्ने र नमेटिने
असली शब्दहरुको उपहार दिन मन छ
नाकि कुनै फोटोकपीरूपी सम्झना होइन