त्रिभुवन अन्तर्राष्ट्रिय विमानस्थल आजदेखि दैनिक २१ घण्टा संचालनमा

काठमाडौंको त्रिभुवन अन्तर्राष्ट्रिय विमानस्थल आजदेखि दैनिक २१ घण्टा सञ्चालनमा आएको छ ।

विगत ३ महिनादेखि दैनिक १० घण्टा बन्द हुँदै आएको विमानस्थल आजदेखि पूर्ववतरुपमै सञ्चालनमा आएको हो ।

३ हजार मिटर लामो धावन मार्गमा नयाँ कालोपत्र गर्ने काम सकिएसँगै दैनिक २१ घण्टा नै विमानस्थल सञ्चालनमा ल्याइएको हो ।

विमान उड्नु अगाडि प्रयोग गर्ने मार्ग र विमानस्थलको भित्रि सडकको निर्माणको काम भने २ महिनापछि सुरु गरिने छ ।

झन्डै ४० वर्षपछि देशको एकमात्र अन्तर्राष्ट्रिय विमानस्थल त्रिभुवन विमानस्थलको धावनमार्गमा नयाँ कालोपत्रे गर्ने भन्दै तीन महिनाका लागि विमानस्थल १० घण्टा बन्द गरिएको थियो ।

जसका कारण राति १० बजेदेखि बिहान ८ बजेसम्म कुनै पनि उडान हुन पाएका थिएनन् ।

चिनियाँ निर्माण कम्पनीलाई निर्माणको जिम्मा दिइएको उक्त धावनमार्ग कालोपत्रेको काम तोकिएकै समयभित्र सकिएको अधिकारीहरूको भनाइ छ ।

त्रिभुवन अन्तर्राष्ट्रय विमानस्थलका महाप्रबन्धक राजकुमार क्षेत्रीले अब बिहान ६ बजेदेखि अर्को बिहान ३ बजेसम्म दैनिक अर्थात २१ घण्टा विमानस्थल सञ्चालनमा ल्याइने बताए ।

त्रिभुवन विमानस्थलमा दैनिक औसत ४ सय पटक उडान र अवतरण हुने गर्दछन् ।

नयाँ कालोपत्र गरिएसँगै कम्तिमा अबको १० वर्षका लागि विमानस्थलमा विमान उडान र अवतरणमा हुँदै आएका समस्या अन्त्य भएको दाबी विमानस्थल कार्यालयले गरेको छ ।