चलचित्र निर्माता दिनेश गुरुङ तमू समाज सिड्नीको अध्यक्षमा चयन

तमू समाज सिड्नी अष्ट्रेलियाको अध्यक्षमा चलचित्र निर्माता दिनेश गुरुङ सर्वसम्मत रुपमा चयन हुनुभएको छ ।

गत सेप्टेम्बर ७ तारिखमा सम्पन्न भएको समाजको अधिवेशनबाट दिनेश गुरुङको नेतृत्वमा २५ सदस्यीय नयाँ कार्यसमितिको चयन गरिएको हो ।

जसको उपाध्यक्षमा भोज गुरुङ र जीवन गुरुङ, महासचिवमा अर्जुन गुरुङ चयन हुनुभएको छ भने सचिवमा हेउपति गुरुङ, कोषाध्यक्षमा डा.समिता गुरुङ तथा साँस्कृतिक संयोजकमा भिमसम्सेर गुरुङ र महिला संयोजकमा शीला गुरुङलाई चयन गरिएको छ ।

नवनिर्वाचित अध्यक्ष दिनेश गुरुङ अभियान फिल्मस प्रा.लि.द्धारा निर्माण गरिएको चलचित्र युम्पो देउरालीका निर्माता हुनुहुन्छ । चितवन स्थायी घर भएका गुरुङ रोजगारको शिलशिलामा विगत लामो समयदेखि अष्ट्रेलियामा बस्दै आउनुभएको छ ।

त्यहाँस्थित पुरानो संस्थाहरूमध्ये सक्रिय संस्थाको रुपमा तमू समाज सिड्नीले आफनो परिचय बनाएको छ । समाजले स्थापनाकालदेखि नै पुस १५ ल्होछार, बुद्ध जयन्ति आदि चार्डपर्वहरुलाई त्यहाँ रहेको हरेक नेपाली समुदायसँग हातेमोलो गर्दै मनाउँदै आएको छ ।

नवनिर्वाचित कार्यसमितिलाई निवर्तमान अध्यक्ष टंक गुरुङले खादा लगाएर स्वागत तथा शुभकामना दिनुभएको थियो ।