अब सिक्लेसमा पनि सूचना केन्द्र

नेपालको एकसय पर्यटकीय गन्तव्य मध्येको एक कास्कीको सिक्लेस गाउँमा निर्मित “सिक्लेस सूचना केन्द्र” को एक समारोहका बीच गण्डकी प्रदेशका भौतिक पूर्वाधार विकासमन्त्री रामशरण बस्नेतले समुद्घाटन गर्नुभएको छ ।

सिक्लेस होमस्टे व्यवस्थापन समितिका अध्यक्ष टाईमाया गुरुङको अध्यक्षतामा सम्पन्न भएको कार्यक्रममा गण्डकी प्रदेशका भौतिक पूर्वाधार विकासमन्त्री रामशरण बस्नेतले पर्यटन विकास नै सिक्लेस क्षेत्रको समृद्धिको मुख्य आधार रहेको बताउनुभयो ।

साथै सिक्लेससम्मको पिच बाटोको निम्ति प्रदेश सरकारले नियमित बजेट बिनियोजन गर्ने प्रतिबद्धता समेत उहाँले जनाउनु भयो ।

सोही कार्यक्रममा गण्डकी प्रदेशका सांसदद्वय मनबहादुर गुरुङ र चन्द्रमोहन गौचनको समेत उपस्तिथि रहेको थियो भने मादी गाउँपालिकाका अध्यक्ष वेदबहादुर गुरुङ “श्याम” ले मादीको समृद्धिको प्रमुख आधार भनेकै पर्यटन र जलविद्युत रहेको कुरा औल्याउनु भयो ।

सोही अवसरमा उहाँले सिक्लेस, क्हफुच्ये हिमताल, क्होंला सोंथर र कोरिको विकासको निम्ति आफू सदैव लागिरहने र त्यसको लागि विस्तृत परियोजना प्रतिवेदनसमेत तयार भईसकेको बताउनु भयो ।

कार्यक्रममा प्रमुख अतिथि लगायतका विशिष्ट अतिथिहरुलाई सिक्लेस होमस्टेको तर्फबाट सिक्लेसमा निर्मित मायाको चिनो प्रदान गरिएका थिए भने सिक्लेस आमा समूह र सिक्लेस होमस्टेको तर्फबाट विविध साँस्कृतिक कार्यक्रमको आयोजना समेत गरिएको थियो ।

सिक्लेस होमस्टेका सचिव पदमबहादुर गुरुङले सञ्चालन गर्नुभएको कार्यक्रममा वडाध्यक्ष सुरजकुमार गुरुङले पर्यटन विकासका बारेमा आफनो धारणा राख्नुभएको थियो ।