भू.पू. माननिय नन्दजंग गुरुङको बेलायतमा दुःखद निधन

भू.पू. राष्ट्रिय पञ्चायत सदस्य तथा समाजसेवी नन्दजङ गुरुङको बेलायतमा दुःखद निधन भएको छ ।

कास्कीको मादी गाउँपालिका वडा नं. २ ताङतिङ पण्डित टोलमा जन्मिनु भएका नन्दजङ गुरुङ विगत केही समयदेखि बेलायतमा बसोबास गर्दै आउनु भएको थियो ।

उहाँ एक राजनीतिज्ञ मात्रै नभई तमू जातिको इतिहासविद्, पैडी एवम् एक कुशल बुद्धिजिवी पनि हुनुन्थ्यो । विगत केही समयदेखि क्यान्सर रोगबाट ग्रस्त हुनुभएका उहाँको गए राती बेलायतमा ८७ वर्षको उमेरमा निधन भएको हो ।

उहाँको निधनले ताङतिङबासीले एक कुशल अभिभावक, सामाजिक अभियान्त तथा सबैको मार्ग दर्शक गुमाएको मादी गाउँपालिका अध्यक्ष वेदबहादुर गुरुङ (श्याम) ले बताउनु भयो ।

यस्तै मादी २ का वडा अध्यक्ष एकजंग गुरुङले उहाँको निधनको खबरले पुरै ताङतिङबासी शोकमा डुबेको भन्दै आज ताङतिङमा उहाँको निधनप्रति दुःख व्यक्त गर्दै गाउँबासीले गाउँ बारेर शोक मनाएको बताउनुभयो ।

उहाँको निधनप्रति मादी गाउँपालिका तथा मादी २ को वडा कार्यालय, ताङतिङ मञ्च युके परिवार, ताङतिङ दुध पोखरी तमू समाज पोखरा, नेपाली जनसम्र्पक समिति बेलायत, लण्डनको बोरो अर्फ बनेर्टका उप मेयर लक्ष्यबहादुर गुरुङ लगायतले विज्ञप्ती मार्फत दुःख व्यक्त गरेको छ ।

वि.सं. २०२१ सालमा तत्कालिन लमजुङ जिल्लाको प्रतिनिधित्व गरेर माननिय बन्नु भएका उहाँले ताङतिङ गाउँलाई देश विदेशमा चिनाउनुका साथै आफनो क्षेत्रमा विकास निर्माणको काममा महत्वपूर्ण भूमिका निर्वाह गर्नुभएको थियो । स्वर्गिय गुरुङको ४ जना छोरीहरु एक जना छोरा र श्रीमती हुनहुन्छ ।