छायाँकारहरुको पहलमा चलचित्र प्राविधिकलाई खाद्यान्न वितरण

लकडाउनका कारण काम अभाव भएपछि समस्यामा परेका चलचित्रका प्राविधिकहरुलाई पोखराका ३ छायाँकारहरुको नेतृत्वमा खाद्यान्न वितरण गरिएको छ ।

छायाँकार सन्तोष कोन्मे, प्रकाश गुरुङ ‘काश’ र प्रेम गुरुङको संयोजनमा ३० जना प्राविधिकहरुलाई खाद्यान्न वितरण गरिएको हो ।

राहत वितरणको क्रममा छायाँकारहरुले केही फिल्मकर्मीहरु मार्फत आर्थिक संकलन गरेका थिए ।

त्यो सँगै पोखरा फिल्म सोसाइटीले पनि राहत वितरणमा सहकार्य गरेको थियो । ‘लकडाउनले यतिबेला चलचित्र प्राविधिकहरु बेरोजगार छन् ।

दैनिक काम गरेर आफ्नो खाना जुटाउँदै आएका प्राविधिकहरु अहिलेको अवस्थामा निकै समस्यामा छन् । त्यसैले हामीले हाम्रो तर्फबाट उनीहरुलाई सहयोग गरेका हौँ ।’ छायाँकार मध्येका एक सन्तोष कोन्मेले भने ।

चलचित्र प्राविधिकहरु मध्ये पनि विशेष गरि लाइटम्यान र मेकअप आर्टिस्टलाई राहत उपलब्ध गराईएको थियो ।

फिल्म छायाँकन नहुँदासम्मका लागि प्राविधिकहरु समस्यामा रहने भएका कारणले आगामी दिनमा पनि उनीहरुलाई थप सहयोग उपलब्ध गराउनका लागि ३ जना छायाँकारहरुले पहल गर्ने बताएका छन् ।