विश्वभर छरिएर रहेका ताङतिङबासीबीच प्रथम जुम मिटिङ सम्पन्न

विश्वभर छरिएर रहेका ताङतिङबासीबीच प्रथम जुम मिटिङ सम्पन्न

टौ गुरुङ

कास्कीको मादी गाउँपालिका वडा नं २ ताङतिङ जन्मभूमि भई हाल विश्वभर छरिएर रहेका ताङतिङबासीको साझा प्लाटफर्म “ताङतिङ ग्लोबल नेटवर्क” ले प्रथम जुम मिटिङ सम्पन्न गरेको छ ।

ताङतिङ समाज युकेका अध्यक्ष एवम् लण्डन बरो अफ बारनेटको उपमेयर काउन्सिलर लक्ष्यबहादुर गुरुङको पहल र संयोजनमा सम्पन्न उक्त मिटिङमा जन्मभूमिसँग सम्बन्धित विविध विषयहरुमा छलफल भएको थियो ।

बैठकले हालै निधन हुनुभएका भुपु माननीयद्धय ताङतिङ समाज युकेका संरक्षक नन्दजंग गुरुङ र मेजर दीपकबहादुर गुरुङ तथा कोभिड १९ बाट विश्वभर मृत्यु भएका सम्पुर्णमा दुःख ब्यक्त गर्दै एक मिनेट मौन धारण गरिएको थियो ।

बैठकमा उपमेयर काउन्सिलर लक्ष्यबहादुर गुरुङले सहभागी सम्पुर्ण गाउँलेहरुलाई स्वागत गर्नुहुँदै प्रथम जुम मिटिङको उद्धेश्यबारे प्रकाश पार्नु भएको थियो ।

बैठकमा पोखरा स्थित ताङतिङ दुधपोखरी तमू समाजघर पोखराको पुनः निर्माण, ताङतिङ कल्याणकारी कोष, ताङतिङ लगानी कम्पनी, ताङतिङ खेल मैदान र ताङतिङको शिक्षाको विकास सम्बन्धि विशेष छलफल भएको थियो ।

यी विषयहरुमा सम्बन्धित व्यक्तित्वहरुले हालसम्मको प्रगति विबरण र त्यसँंग सम्बन्धित अरु कुराहरु सहभागी गाउँलेहरुलाई जानकारी गराउनुभएको थियो ।

साथै बैठकमा मादी गाउँ पालिका वडा नं १ सिक्लेस र वडा नं २ ताङतिङ बीचको सिमाना सम्बन्धमा गहन छलफल भएको थियो ।

मादी गाउँपालिका अध्यक्ष वेदबहादुर गुरुङ र मादी २ का वडा अध्यक्ष एक्कजंग गुरुङले सहभागी गाउँलेहरुलाइ प्रस्तुत प्रस्तावनाहरुबारे नेपाल सरकार र स्थानीय सरकारको पक्षबाट कानुनी प्रावधान, नीति नियम आदिबारे प्रष्ट पार्नुभएको थियो ।

ताङतिङको सर्बाङ्गिण विकास सम्बन्धमा झण्डै साढे चार घण्टा समय लगाएर प्रविधि मार्पmत छलफल गरिएको यो प्रथम ऐतिहासिक बैठक हो ।

बैठकमा नेपाल सहित विश्वभर छरिएर रहेका ताङतिङबासीको सहभागिता रहेको थियो । यस जुम संवादको प्रविधिमा सहयोग र सञ्चालन ताङतिङ समाजका सचिव टौ गुरुङले गर्नुभएको थियो ।

साझा गर्नुहोस् : Share It :