शिक्षा तालिम केन्द्र गण्डकीको रोष्टर प्रशिक्षक प्रशिक्षण सम्पन्न

शिक्षा तालिम केन्द्र गण्डकी प्रदेशले रोष्टर प्रशिक्षकका लागि प्रदेशस्तरीय प्रशिक्षक प्रशिक्षण सम्पन्न गरेको छ ।

तालिम केन्द्र दमौलीको विस्तारित शाखा अमरसिंहमा भएको एकहप्ते प्रशिक्षणमा केन्द्रले गण्डकी प्रदेशका माध्यमिक तहका नेपाली, अड्ग्रेजी, गणित, विज्ञान र सामाजिक विषयका १ सय ५० जना शिक्षकहरुलाई प्रशिक्षित गराएको हो ।

प्रशिक्षण कार्यक्रमको समापन समारोहमा बोल्दै शिक्षा तालिम केन्द्र गण्डकी प्रदेशका प्रमुख नेपालहरि रानाभाटले रोष्टर प्रशिक्षणले गण्डकी प्रदेशमा विषयगत रुपमा दक्ष, योग्य र अब्बल प्रशिक्षक तयार भएको बताउनुभयो ।

रानाभाटले अब हुने टिपिडी तालिममा उहाँहरु मध्येकाले नै अन्य शिक्षकलाई प्रशिक्षण दिने बताउँदै प्रशिक्षकहरुलाई आफ्नो ज्ञान र क्षमताको प्रर्दशन गर्न तयारी अवस्थामा रहन आग्रह गर्नुभयो ।

त्यस्तै तालिममाले प्रशिक्षकहरुमा ताजगीकरण, सिकाइका नवीनतम कला, शिक्षण सिकाइ सहजीकरणको नवीन विधिको ज्ञान, सिकाइमा सूचना प्रविधिको प्रयोगसम्बन्धी ज्ञानको विकास भएको बताउँदै प्रशिक्षण सफल भएको बताउनुभयो ।

कार्यक्रममा तालिम केन्द्रका प्रमुख नेपालहरि रानाभाट र विज्ञान विषय प्रशिक्षक रुद्रमणि पौडेलले सहभागीहरुलाई प्रमाणपत्र वितरण गर्नुभएको थियो ।

तालिम केन्द्र गण्डकी प्रदेशका शाखा अधिकृत विदुरहरि आचार्यले सञ्चालन गरेको कार्यक्रममा सहभागीको तर्फबाट जुना थापा र गोपालबाबु मरहठ्ठाले आफ्ना भनाई राखेका थिए ।