आइतबारदेखि हुने घाचोक माछापुच्छ्रे महोत्सवको तयारी पुरा

माछापुच्छ्रे गाउँपालिका–३, घाचोक स्थित परिवर्तनका लागि युवा संजाल(युनेक) नेपालको आयोजनामा आइतवारदेखि सुरु हुने तेस्रो घाचोक माछापुच्छ्रे महोत्सवको सम्पूर्ण तयारी पुरा भएको छ ।महोत्सव यहि बैशाख २१ गतेसम्म चल्ने जनाइएको छ ।

आयोजक युनेक नेपालले शुक्रवार पोखरामा पत्रकार सम्मेलन गरी सोबारे जानकारी दिएको हो । महोत्सवको औचित्यमाथि प्रकाश पार्दै मूल आयोजक समितिका सदस्य सचिव रेशम नेपालीले महोत्सवका आकर्षणहरुमा अन्तर क्लव स्तरीय पुरुष भलिवल प्रतियोगिता, यूनेक डान्सिङ आइडल(सिजन २) को ग्राण्ड फिनाले, मौलिक झाँकी प्रदर्शनी तथा योग प्रतियोगिता लगायत रहेको बताए ।

त्यसका साथै रत्यौली गीत प्रतियोगिता, दुध र बदामबाट बनेका परिकारहरु, होमस्टेमा बस्ने व्यवस्था एवम् हास्य कलाकारका प्रस्तुतिहरु तथा यूनेक नेपाल सामाजिक सेवा पुरस्कार प्रदान गर्न लागिएको पनि उनले जनाए ।

संस्थाका अध्यक्ष मौसम कार्कीले पहिला उत्सवको रुपमा मनाउँदै आएको मेलालाई यसपटक महोत्सवको आकार दिएको भनाई राखे ।उनले महोत्सवमा कुल ६५ वटा स्टल रहने जसमध्ये १५ वटा कृषि प्रायोजनका लागि निःशुल्क उपलब्ध गराउने पनि जानकारी दिए ।