कोरोना महामारीले पोखरा विमानस्थलको निर्माण कार्य तोकिएकै समयमा सक्न हम्मेहम्मे

कोरोना महामारीले पोखरा विमानस्थलको निर्माण कार्य तोकिएकै समयमा सक्न हम्मेहम्मे

पोखरा क्षेत्रीय अन्तर्राष्ट्रिय विमानस्थलको काम सन २०२१ को जनवरी अर्थात् सम्झौता अवधिभन्दा ६ महिनाअघि नै सक्ने आयोजनाको दावी थियो ।

त्यसैअनुसार तीव्र गतिमा काम भइरहेको थियो । तर कोरोना भाइरसको महामारीका कारण पोखरा क्षेत्रीय अन्तर्राष्ट्रिय विमानस्थल तोकिएकोभन्दा ६ महिनाअघि होइन, तोकिएकै समयमा पनि पूरा नहुने देखिएको छ ।

पोखरा क्षेत्रीय अन्तर्राष्ट्रिय विमानस्थलमा अहिले चिनियाँ कामदार तथा प्राविधिक र निर्माण सामग्री तथा उपकरणको अभाव भएको छ ।

विमानस्थलमा काम गर्ने झण्डै दुई सय कामदार चीनमै रोकिएका छन् । ३० जना प्राविधिक तथा कामदार नेपाल ल्याउनका लागि कूटनीतिक पहल भएको र भिसा प्रक्रियामा गएको विमानस्थल आयोजनाका प्रमुख विनेश मुनकर्मीले जानकारी दिनुभयो ।

‘चीनबाट कामदार र प्राविधिक आएका छैनन्, केरुङमा दुई ठूला उपकरण रोकिएका छन्, हामीले पूर्ण क्षमतामा काम गर्न पाएका छैनौं’ आयोजना प्रमुख मुनकर्मीले भन्नुभयो ।

सन् २०२१ को जुन महिनामा निर्माण कार्य सकिन्छ त ? मुनकर्मीले भन्नुभयो, ‘तोकिएको समयभन्दा ६ महिनाअघि सकिने सम्भावना सकियो, तोकिएको समय अवधिभित्र सक्न पनि मुश्किल हुने देखिएको छ ।’

झण्डै २३ अर्ब रुपैयाँको लागतमा निर्माण भइरहको पोखरा क्षेत्रीय अन्तर्राष्ट्रिय विमानस्थलको निर्माणपछि काठमाण्डौ विमानस्थलको चाप कम हुने र पर्यटक बढ्ने अपेक्षा लिइएको छ । अहिलेसम्म विमानस्थलको ६४ प्रतिशत भौतिक प्रगती र ४७ प्रतिशत वित्तीय प्रगती रहेको छ ।

कयौं आयोजना ढिलासुस्ती भइरहेको बेला पोखरा विमानस्थलले भने तोकिएको समयभन्दा चाँडो काम सक्ने लक्ष्यका साथ काम गरेपछि धेरैतिर उत्साह थपिएको थियो ।

तर कोरोना भाइरसको महामारीका कारण सरकारले लगाएको लकडाउन र अन्य देशले लगाएका नयाँ प्रावधानका कारण यो आयोजना ६ महिनाअघि होइन, सम्झौता गरिएको अवधिमा पनि सम्पन्न नहुने अवस्थामा पुगेको छ ।

साझा गर्नुहोस् : Share It :

आजको खबर

तमु साँस्कृतिक प्रतिष्ठानद्धारा छात्रवृत्ति वितरण

तमु साँस्कृतिक प्रतिष्ठान नेपालद्धारा शैक्षिकसत्र २०८१ को लागि “तमु विद्यार्थी छात्रवृत्ति वितरण कार्यक्रम’ यही असोज ३ गते, बिहीबार पोखरा फिर्केस्थित पोखरा इन्जिनियरिङ कलेजको सभाहलमा सम्पन्न…

अझै पढ्नुहोस्