गुरुङहरुलाई मुख्य मन्त्रीको प्रश्न समय बदलिदा तिमीहरु किन नबदलेको ?

गुरुङहरुलाई मुख्य मन्त्रीको प्रश्न समय बदलिदा तिमीहरु किन नबदलेको ?

गण्डकी प्रदेशका मुख्यमन्त्री पृथ्वी सुब्बा गुरुङले गुरुङहरुले खाने लगाउने सबै कुराको नक्कल गर्न जानेको तर राजनीतिको नक्कल गर्न नजानेको बताउनु भएको छ । तमू धिं नेपालका आयोजनामा आज पोखरामा सम्पन्न भएको ट्होंटे पर्वलाई सम्बोधन गर्दै उहाँले सो कुरा बताउनु भएको हो ।

समयसँगै मुलकमा धेरै परिवर्तन भएको थुप्रै खाले राजनीतिक घटनाक्रमहरु घटी सकेता पनि गुरुङ समुदायमा आफूले सोचेको जस्तो परिवर्तन नआएको उहाँको भनाई छ ।

गुरुङहरुको निधारमा सधैं बन्दुक बोक्न मात्रै नलेखेको भन्दै उहाँले गुरुङहरुले हङकङक बेलायतमा गएर पोखरामा बनाउने जस्तो घर नेपालमा सुब्बा अधिकृत तहका कर्मचारीले पनि बनाएकोले अब बन्दुक र विदेशको मानसिकता त्यागी दिन आग्रह गर्नुभयो ।

गण्डकी प्रदेशको मुख्य मन्त्रीको हैसियातले आफूले यस प्रदेशको नाम तमूवान राख्न नसकेकोमा गुरुङ समुदायले आफूसँग चित्ता दुखाएको भन्दै उहाँले आफू गुरुङ समुदायको मात्रै मुख्य मन्त्री नभएर सबै समुदायको मुख्य मन्त्री भएको कारण कतिपय कुरामा बल पुगेर पनि काम गर्न नसकेको भन्दै अब एउटै कुरामा चित्ता दुखाएर नबस्न समेत उहाँले आग्रह गर्नुभयो ।

तमूवानको मुद्धा तमू समुदायले भन्दा आफूले पहिला बुझेर पहिलो संविधानसभामा पार्टीको ह्वीव समेत लत्याएर संर्घष गर्दै संविधानसभामा आफूले ककसको नेतृत्व समेत गरेको र त्यो आन्दोलन सफल नभएपछि पहिलो संविधान सभाको विघठन हुनुलाई आफूले कालोदिनको रुपमा लिएको बताउनुभयो ।

आफू नेपालको ७ वटा प्रदेश मध्ये गण्डकी प्रदेशलाई उत्कृष्ट प्रदेशको रुपमा विकास गर्ने उद्घोषका साथ अघि बढेको भन्दै आफनो अभियानमा साथ दिन गुरुङ समुदायसँग उहाँले आग्रह समेत गर्नुभयो ।

कार्यक्रमलाई आदिवासी जनजाति समयन्वय परिषद कास्कीका अध्यक्ष धर्म गुरुङ, नेपाल आदिवासी जनजाति पत्रकार महासंघ फोनिज कास्कीका अध्यक्ष एमबी आस्था, फोनिजका गण्डकी प्रदेश संयोजक तथा तमू धि नेपालका उपाध्यक्ष हुमबहादुर गुरुङ लगायतले सम्बोधन गर्नुभएको थियो ।

ट्होंटे पर्व संयोजक मेनकाजी गुरुङको स्वागत मन्तव्य रहेको कार्यक्रम तमू धि नेपालका अध्यक्ष कर्म तमूको अध्यक्षतामा सम्पन्न भएको थियो भने महासचिव गिरीप्रसाद तमूले कार्यक्रम सञ्चालन गर्नुभएको थियो ।