जुत्ता चप्पल बनाउने तालिम सकियो

आमा मिलन केन्द्रद्धारा संचालित मखमली जुत्ता, चप्पल बनाउने एक महिने सीपमूलक तथा नेतृत्व विकास तालिम सकिएको छ । करिब ४५ जनाले उक्त तालिम लिएका थिए ।

गण्डकी प्रदेश सामाजिक विकास मन्त्रालयका सचिव दीर्घनारायण पौडेल, पोखरा–८ का वडाध्यक्ष रुद्रनाथ बराल, संचारकर्मी दुर्गा अधिकारी र महिला अधिकारकर्मी तारा थापाले प्रशिक्षार्थीलाई प्रमाणपत्र वितरण गरे ।

कार्यक्रममा बोल्दै सचिव पौडेलले गण्डकी प्रदेश सामाजिक विकास मन्त्रालय महिलाहरुको सीप विकासका लागि आमा मिलन केन्द्रसँग सहकार्य गर्ने प्रतिबद्धता जनाए । उनले तालिमलाई जीवनोपयोगी बनाउन प्रशिक्षार्थीसामु आग्रह गरे ।

पोखरा महानगरपालिका वडा नं ८ का वडाध्यक्ष रुद्रनाथ बरालले महिलाहरुलाई आत्मनिर्भर बनाउन सीप विकास तालिमको आवश्यक रहेको औंल्याए । महिलाहरुलाई आत्मनिर्भर बनाउन वडाले सहयोग गर्ने प्रतिबद्धता जनाए ।