पत्रकार विरही र सिग्देल पुरस्कृत

नेपाल पत्रकार महासंघ कास्कीको १७ औं साधारणसभा तथा १२औं अधिवेशनको अवसरमा विभिन्न पुरस्कारबाट पत्रकारहरुलाई सम्मान गरिएको छ ।

पूर्व सांसद तथा समाजसेवी सूर्यबहादुर केसीको परिवारबाट स्थापित ‘कृति स्मृति पत्रकारिता वृत्ति सम्मान’ बाट महासंघका पूर्व केन्द्रीय अध्यक्ष हरिहर विरहीलाई सम्मान गरिएको छ । प्रथम राष्ट्रपति डा. रामवरण यादवले रु. १ लाख ११ हजार राशि रहेको उक्त परस्कारबाट विरहीलाई सम्मान गरेका हुन् । विरही ४४ वर्षदेखि पत्रकारितामा छन् ।

सो अवसरमा पत्रकार श्रीराम सिग्देललाई ‘आर्थिक पत्रकारिता पुरस्कार’ बाट पुरस्कृत गरिएको छ । चलचित्र पत्रकार संघ कास्कीका संस्थापक अध्यक्ष एवं फेवा पोष्टका सह–सम्पादक सिग्देललाई रु. २० हजार राशी र सम्मानपत्रले सम्मान गरिएको हो ।

यसैगरी शिरोमणि बराल, सुरेन्द्र थापामगर, ज्यो.डा. बलराम उपाध्याय रेग्मी र विश्वप्रकाश लामिछानेलाई दीर्घ पत्रकारिता सम्मान प्रदान गरिएको थियो । विमला भण्डारी नेतृत्वको ३ वर्षे कार्यकालमा उत्कृष्ट कार्यसमिति सदस्यबाट सन्तोष बस्याल नगद रु. १० हजारसहित सम्मानित भए ।

सो अवसरमा बोल्दै पूर्व राष्ट्रपति डा. यादवले संविधान र लोकतन्त्रको रक्षक मिडिया भएकाले पत्रकारहरु राजनीतिभन्दा माथि रहेर निष्पक्ष कलम चलाई जनतालाई सुसूचित गर्दै देशलाई सही दिशा तर्फ लान जिम्मेवार भूमिका रहेको बताए ।