मादी ९ मा माघ १६ गतेदेखि चौथो मुग्री मेला हुने

कास्कीको मादी गाउँपालिका वडा नं. ९ मा पर्ने मुग्री गाउँमा माघ १६ देखि २२ गतेसम्म चौथो मुग्री मेला आयोजना हुने भएको छ । नभ प्रभात क्लवको आयोजना तथा विन कुमारी स्मृति प्रतिष्ठानको सहकार्यमा ग्रामीण विकास र पर्यटन प्रवद्र्धनको उद्देश्यले मेला आयोजना गर्न लागेको आज पोखरामा आयोजित पत्रकार सम्मेलनमा मेला संयोजक लब्सन गुरुङले जानकारी दिनुभयो ।

माघ १६ गते उद्घाटन हुने मेला अन्तरगत १९ गतेसम्म सेभेन ए साइड फुटबल प्रतियोगिता लगायत विभिन्न खेलकुद कार्यक्रम आयोजना हुने छ भने २० र २१ गते एकल नृत्य प्रतियोगिताको साथमा विभिन्न ख्याती प्राप्त कलाकारहरुको साँस्कृतिक प्रस्तुती हुने छ भने माघ २२ गते समापन कार्यक्रम हुने आयोजकले जानकारी दिएको छ ।

मुग्री गाउँलाई पर्यटकीय होम स्टेको रुपमा विकास गर्न, पर्यटक प्रवेशद्धार निर्माण गर्न, गाउँ चिनारी वृत्तचित्र निर्माण गर्न, गाउँमा खानेपानीको सहज व्यवस्थापन गर्न तथा गाउँमा लोप भई सकेको मौलिक नृत्यहरुको खोज अनुसन्धान गर्ने उद्देश्यले मेलाको आयोजना गरिएको मादी गाउँपालिका वडा नं. ९ का वडा अध्यक्ष एवं विन कुमारी गुरुङ स्मृति प्रतिष्ठानका अध्यक्ष तोरण गुरुङले जानकारी दिनुभएको छ ।

खुल्ला रनिङ शिल्ड प्रतियोगिताको विजेता समहुले १ लाख रुपैंया र उप विजेता समुहले ५० हजार रुपैंया नगद पुरस्कार प्राप्त गर्ने भएको छ । यस्तै अनुशासित टिमलाई ३ हजार खुल्ला सामुहिक रसि तान्ने प्रतियोगितामा बिजेताले ८ हजार र उप विजेताले ५ हजार नगद पुरस्कार प्राप्त गर्ने भएको छ । यस्तै छेलो बिजेतालाई ५ हजार र उप बिजेतालाई ३ हजार तथा चित्रकला प्रतियोगितामा प्रथमलाई ३ हजार द्धितियलाई एक हजार पाँच सय रुपैंया पुरस्कारको व्यवस्था गरिएको छ ।

यस्तै मेलामा तत्कालिन मिजुरे स्रोत केन्द्र अन्तरगतका उत्कष्ट कृषकलाई नगद ५ हजार र प्रमाणले सम्मान गरिने भएको छ । मेला सम्पन्न गर्न १० लाख ४० हजार रुपैंया खर्च लाग्ने आयोजकले जनाएको छ । नभ प्रभात युवा क्वलका अध्यक्ष सुजन गुरुङको अध्यक्षतामा सम्पन्न भएको पत्रकार सम्मेलनको सञ्चालन मेला संयोजक लब्सन गुरुङले गर्नुभएको थियो ।